Temple of Hmongism​​

Cuaj Hli 15, 2013

 

Nyob zoo tij laug Ywj Pheej Xyooj,

 

Ntawm no kuv yog kwv Yaj Tshoj los yog Yaj Tshoj Keeb. Kuv cia siab tias koj ua tij nrog rau tsev neeg yuav ntsib kev noj qab nyob zoo thiab. Hos kuv los nyob zoo, tiam sis tsis ntev los no thaum lub 6 hli ntawd peb txiv Koob Zeej uas yog tus neeg uas pib lub hauv paus kom peb tsim tawm tus ntawv hmoob 92 ntawv nws tau tag sim neej tso peb tseg lawm mas kuj yog ib qho tu siab heev.

 

Tsis ntev los no kuv tau pom koj los yog nej ib pab tau tsa muaj ib pab pawg muaj lub hom phiaj los txhim kho peb hmoob txoj kev cai dab qhuas uas yog hu ua Hmongism. Kuv zoo siab heev thaum paub tias yog tij laug Ywj Pheej lub zeem muag. Thaum kuv mloog koj cov lus tag lawm kuv haj yam zoo siab heev vim tias kuv ib txwv ntseeg los tias peb txoj kev cai dab qhuas Hmoob no yeej muaj qhov zoo ntau yam rau peb haiv neeg, txawm yog muaj qho puav tsis zoo los yog txog lub caij nyoog ces peb yeej yuav kho tau los yog txiav tau qhov tsis zoo pov tseg thiab nws yeej tsis tau tsim nyog uas peb yuav muab nws tso tseg kiag es mus ua dua ib txoj tshiab. Yam yus cev khaub ncaws uas yus hnav ntev ces nws yeej muaj qhov qub qhov ntuag qhov ntxiv, yus pom luag cev mas zoo li yeej zoo tshaj, tiam sis qhov tseeb tiag luag cev khaub ncaws los nws yeej muaj qhov qub, qhov ntuag, qhov ntxiv tib yam nkaus thiab xwb, mas qhov tseem ceeb ces tsuas yog nyias txawj txuag nyias mas thiaj li yuav kav ntev.

 

Yam li kuv tau hais rau koj ua tij ib zaug los lawm ntawd, thaum xyoo 1996 thiab 1998 peb yeej tau sib tham me ntsis txog kev txhim kho dab qhuas hmoob lawm thiab, thaum ntawv qhov peb los sib tham mas yog vim tias peb cov kev cai dab qhuas hmoob no tsis tau tsheej ua ib txoj religion uas ntiaj teb yuav lees paub, es peb mus kawm ntawv los nplog cia li sau rau peb tias peb ntseeg “phim” los yog “dab” no xwb. Peb lub siab xav mas xav kom peb kho kom peb txoj kev cai dab qhuas tsheej tau ua ib tug religion mas qhov zoo peb yuav, qhov phem peb tso tseg kom nws thiaj yuav loj hlob taus. Vim tias yog peb tsis kho ces qhov zoo los yuav raug luag rhuav, qhov phem los yuav raug luag siv los nyom yus. Tiam sis vim tias peb txuj los qis, chaw los ti, peev los tsawg peb thiaj li tsum lawm xwb, peb thiaj li tau xa lub zeem muag no tuaj rau ib co kwv tij hmoob nyob rau Thaib teb, tiam sis lawv ho muab hloov mus ua kev ntseeg saub lawm xws li pab pawg ntseeg saub Es Npis Mis Nus. Peb thiaj li tsis muaj kev sib cuag lawm.

 

Mas kuv pom zoo thiab txhawb nej sawv daws pab pawg kawg siab kawg ntsws nawb. Kuv ntseeg tias yog ua tau zoo ces tag nrho peb cov hmoob thoob ntiaj teb uas tseem coj kev cai dab qhuas yeej tsis muaj ib lo lus cam li, vim sawv daws tos los ntev lawm, thiab nws kuj txog caij hloov kho lawm. Vim peb yeej yuav raws txoj lw qub tiam sis peb muab kho kom tseeb kom zoo kom muaj txiaj ntsig coj tau peb sab ntsuj pliag siab ntsws los kuj ib yam li kev ua neeg zoo, ces peb thiaj li yuav paub txog txiaj ntsig ntawm peb tej dab qhuas. Ib txhia lawv muab hloov kiag mus deb yam li cov Poj Koob Yawm Ntxwv, los yog cov Es Npis Mis Nus uas kuv hais ntawd mas nws yog txoj tshiab lawm yuav ua cas thiab yuav txog hnub twg nws mam li loj hlob tuaj zoo cuag peb txoj uas twb muaj tau los nto txheeb pua xyoo los no lawm. Thiab yog txoj tshiab ces kuv yeej muaj cai xaiv tias yog kuv nyiam kuv mam mus ntseeg tiam sis yog kuv tsis nyiam ces kuv tsis ntseeg los tau. Tsis tag li ntawd, yog peb ua tau zoo cov ntseeg yes xus los yog lwm yam kev ntseeg lawm los lawv yeej yuav tig rov los ua yus li dab qhuas.

 

Hais txog kev txhim kho ntawm peb txoj kev cai dab qhuas hmoob no raws li nej lub hom phiaj uas yog ua kom tseeb, luv sij hawm, siv peev tsawg... uas yog peb hais yooj yim tias kho kom ncaj thiab mus yog kab yog kev mas yog ib qhov kev txhim kho uas vam meej heev. Tiam sis raws li kuv xam pom mas kuj tsis paub tias nej puas tau sab laj txog ntawm cov kev qhuab qhia kom peb ua neeg zoo, vim kuv pom tias saib raws peb cov kev cai dab qhuas mas seem no tseem muaj tsawg heev thiab tsis tau tseeb puas tsawg mas nws thiaj li ua rau peb cov neeg siab ti siab nqaim siab ceev tsis txawj sib hlub puas tsawg.

 

Cov ntseeg Yesxus lawv ntseeg tias muaj ntuj ceeb tsheej, muaj dab teb, yog ntseeg yes xus thiab ua neeg zoo raws yes xus qhia ces thaum tuag lawm yus tus plig yuav mus tau rau ntuj ceeb tsheej, tiam sis yog ua txhaum ces yuav mus rau dab teb. Cov ntseeg Hauj sam lawv kuj muaj Shin 5 thiab. Es peb cov kev cai dab qhuas Hmoob yog qhov twg? tsim nyob peb yuav tau muab nws collection los ua ib qho tseeb qhuab qhia peb cov neeg coj kev cai dab qhuas no.

 

Raws li kuv pom mas peb Hmoob yeej muaj ib co qhia txog fab no thiab xws li qhia txog vij, sub, npog. Tiam sis peb tseem tsis tau muab nws hais kom meej meej tias vij yog dab tsi? sub yog dab tsi? npog yog dab tsi? thiab yuav ua cas es thiaj li yuav tsis muaj vij? yuav ua cas thiaj li yuav tsis muaj sub? yuav ua cas thiaj li yuav tsis muaj npog? Cov no yog peb txheeb tau tej zaum nws kuj yuav yog ib qho kev qhuab qhia kom peb ua neeg zoo. Piv xam tias Sub, yog ntshav. Yog yus ib tee ntshav nrog tawm ntawm yus lub ces los ces nws dhau ua ib qho sub rau yus, yus ho tua ib tug neeg tuag ntshav nrog liab vog los nws kuj yog ib qho sub rau yus... yog leej twg muaj sub ntau nws raug mob me me xwb los sub los laum ces nws cia li sab heev lawm, tej thaum raug tej qho tsis tsim nyog tuag los yeej tuag taus. Qhov no kuj yog ib qho qhia kom neeg txhob tsim sub rau yus, yus yuav tsum txhob ua raug yus los ntshav thiab txhob ua kom lwm tus los ntshav yus thiaj li tsis muaj sub... Npog yog qhov uas yus tau ua ib qho kev txhaum tab sis tsis muaj leej twg paub, tsis muaj leej twg pom los yog yus tseem tsis tau them lub txim txhaum ntawv kom tag mas nws thiaj li ua npog los looj koov yus, tus neeg uas muaj npog ces yuav ib sij ntsib ib qho phem yam li caij zoj tsheb, tsheb txawm siv ntog los yog sib tsoo, mus zoj hav zoov nab txawm siv tom, ua zoj ib yam dab tsi txawm siv muaj plaub, los yog ib sij muaj mob... Yog yuav kom txhob ua npog ces txhua yam kev txhaum ntawm yus yus yuav tsum lees them lub txim kom tag mus.

 

Thiab kuj piv li qhov hmoob ntseeg tias tus plig rov los thawj thiab, hmoob kuj ntseeg tias yus tus plig mas tej thaum kuj rov los thawj ua neeg, tej thaum kuj mus thawj ua tsiaj, ua qaib, ua npua, ua nas, ua noog... mas hmoob yeej hais hauv zaj qhuab ke tias kom txhob mus thawj ua qaib tsam luag hlais, txhob thawj ua npua tsam luag tua, txhob thawj ua nyuj tsam luag ntaus mas kom rov los thawj ua neeg. Qhov no tej zaum nws kuj muaj ib qho kev qhuab qhia tias thaum peb ua neeg nyob peb yuav tsum ua neeg zoo thiaj li tau rov thawj ua neeg, yog koj ua ib tug neeg phem muaj veeb muaj khuv, muaj vij muab sub tej zaum luag yuav aiv kom koj mus thawj ua tsiaj them koj txoj kev txhaum.

 

Nyob rau hauv txoj kev ntseeg Es Npis Mis Nus mas lawv tseem khaws peb txoj kev txhim kho hais txog kev ploj tuag (pam tuag), kev tshoob kos, thiab kev neeb yaig, kev hu plig tej no peb tsis xav kom siv tsiaj li, vim tias siv tsiaj ces nws yuav ua rau ib txoj sia tsiaj tuag yuav ua ib lub vij rau yus thiab

Kev pam tuag; tsis xav pub siv tsiaj los tua rau tus tuag lawm, peb tsuas qhuab ke, tshuab qeej ntaus nruas. Tiam sis tsis muaj tus tsiaj ntiag hnub ntiag hmo los yog hnub tawm nras kuj tsis tua tsiaj li lawm yog yuav tua los tsuas tua los ua zaub mov rau cov tuaj zov los yog kwv tij neej tsa tuaj saib tuaj xyuas xwb. Dua ntawd lawm kuj tsis xav kom muaj lub suab nyiav, txawm muaj kev tu siab sib hlub sib nco los nyias quaj nyias ntsiag to xwb. Hmo hais xaiv los kuj tsis pub muab plaub ntug los tham lawm.

 

Kev ua neeb ua yaig los yeej tsis xav kom muab tsiaj mus txhaws neeg lub qhov tuag thiab mus thaiv tes thaiv taw li qub lawm, peb tsuas siv xyab siv ntawv, yaj khaum yeeb khaum hlawv ua nyiaj mus them tej kev txhaum, mus txhiv mus tso tej ntsuj tej plig xwb. Txheej thaum ub mas yog yus ib tug neeg txhaum ib txoj cai luag ntes tau ces yuav kom coj lwm tus mus hloov mas thiaj li tso tau nws los, yog yus muab lwm tus mus hloov ces yus tus dim los tshuav tus coj mus hloov yus tus yuav tau nyob lub txim mus. Mas nim no neeg daws plaub daws ntug yeej siv nyiaj xwb them nyiaj txaus ces thiaj li tag plaub. Mas hmoob txoj kev ntseeg ces neeg los yeej thawj thiab ua tsiaj tau hos tsiaj los yeej thawj thiab ua neeg tau mas tus tsiaj los nws tus plig ces yeej muaj nuj nqis ib yam li tug neeg lawm thiab.

 

Tsis tag li ntawd, niaj hnub no kev ua neeb kuj yog ib qho kev siv nyiaj loj, tim peb no muab xam tias muaj mob plab dias hau me ntsis yog mus Hospital tej zaum tsuas tag li 400,000 kip – 500,000 kip xwb, tiam sis yog koj yuav ua ib thaj neeb tej zaum kuj tag ntau tshaj ntawd, mas qhov tag nyiaj ntau ntau no mas tsuas yog yuav tus tsiaj los kho xwb, mas kev ua neeb ua yaig tsuas yog kho sab ntsuj plig xwb peb tsim nyog yuav siv xyab siv ntawv kho es ho tseg tej nyiaj mus yuav tshuaj los kho sab cev nqaij daim tawv zoo dua.

 

Saum toj no yog ib co lus tham pem kuv lam sau tuaj nrog koj sib tham xwb, txawm li cas los xij kuv sau tsab ntawv no tuaj qhua txog koj los yog nej lub luag hauj lwm, thiab cia siab tias yog ib hnub twg nej ua tiav ces peb cov nyob tom qab no los yeej yuav zoo siab heev thiab

Sib ntsib dua.

 

Yaj Tshoj Keeb